Denk-Aufgabe 1503 vom 29.4.2015

 

Housi Moser: "Zum Wohl!"

S git Lüt däne isch wohl
u s git Lüt, däne isch weniger wohl
u de gits Lüt, däne isch eis wohl u eis nid so wohl
u de gits de no dië, wos eigetlech nie wohl isch uf dr Wält -
u mer chan anää, dass ne o nid wohl isch we se das Jammertal namens 'Wält' verlo hei...
Falls me das überhoupt cha?

Me cha sich scho fraage
ob Himu u Höll, Nirwana, Walhalla, di ewige Jagdgründ
u dr Hades, ds Toterich vo den alte Grieche
u was es de süsch no alles git a Orte,
wos de ja eigetlech gar nid git,
falls si nid zur 'Wält' sötte ghöre -
ob all dië Ort oder äbe Nid-Ort no zur 'Wält' ghöre oder nid?

D Grieche si da sälber nid so sicher gsi
u sis vilech o itze nid
wes so töteled us de lääre Banke uf dr Halbinsle...

Uf all Fäll hei se em Hades u der Persephone ihres Tote-Hotel 'Ungerwält' gnamset;
u si hei dr Igang i die Ungerwält am Ändi vor Wält agsidlet!

Die Wälts-Cheibe hei da also ohni Fäderläse e Wält usserhalb vor Wält installiert,
abtrennt dür dr Totefluss Acheron
u bewacht vom drüchöpfige, schlangehaarige Höllehund Kerberus

'Verzell du das am Fährimaa', chöit dir säge
aber dä Fährimaa Charon het nit Gschnurr,
sondern Gält wöue für siner Dienschte.
Gwüsser e Beamte, wo für die hundseländi Fahrt
vor Wält über ds Ändi vor Wält use i d Ungerwält
no öpis verlangt het!
Vo de Tote notabene!
Chönt also o ne Schwizer Bänker si dä Charon.

D Wält z verlo het d Grieche also dozmal scho öppis gchoscht!
Es het müesse en Obolus si,
ke Drachme u scho gar ken Euro het über d Styx ghulfe.

Wär als Tote nid di richtig Münze unger dr Zunge drbi gha het,
het de chönne d'Ewigkeit am Flussufer verbringe.
Also isch die Ungerwält de doch e bitz attraktiver gsi als es Flussufer -
öpis für ds Hirni z stimuliere vo däne, wo bi jedem Füürwehrteich u jedere Glungge d Awohner wei enteigne für en Uferwäg für ds gemeine Volch!
Für d Grieche offebar verreckter als d Höll –
so ständig am Ufer z hocke u übereglare u nid richtig drbi sii bir Schatte-Party.

Ja potztonner isch itze all das no 'Wält' oder nid? –
U wenn nid: wo hört se de uuf? - Ir Mitti vom Acheron? –
De wäre dië ohni Obolus am Flussufer zwar tod, aber no uf dr Wält?
U ume die wo zahlt hei wäre nüm uf dr Wält?

Eigetlech isch es ghupft we gschprunge
will däne wos uf dr Wält nie wohl isch gsi,
däne isch es chum wöhler am Acheron
oder uf dr Fähri
oder am Igang bim Kerberus
oder ds letscht i däm gruselige Toteriich.

U i Himmu chöme dertig ugantlig uzfride-suurtöpfig Chlöis doch o nid?
U wenns no iche chämtid,
fändids de gwüss glich na ne Grung zum e Lätsch mache
wäg däm duurende Hosianna möögge
u Harfe spile u wisser Söckli trage
u gäng lieb u nätt sii
o we ds Nachberängeli en uufplasni Zicken isch
u der Petrus nach Chnobli steicht...
I säg nech: däne wos da hie nie wohl isch, däne wärs bimeich o dert obe nid wohl!

S git allerdings de none ganz angeri sälteni Sorte Lüt,
vo däne gits eso weni, dass si uf dr rote Lischte si:
vom Uusstärbe bedroht!
Das si dië kurlige Cheibe, wos gäng we gäng wohl isch –
o denn, wen ine eigetlech nid wohl isch.
S'isch ne wohl wes ne nid wohl isch, will si meine, es bruchi das halt,
dr Wächsel vo 'wohl' u 'nid so wohl',
will me denn, wes vo 'nid so wohl' zu 'wohl' wächslet,
vill tütlicher gspüri, was 'wohl' eigetlech sig.

U de bringeds die tonners Wäse z Gang,
dass si währed em Weniger-Wohlsii a die Würkig teiche
u drum das Weniger-Wohlsii chöi anää
u sich amänd sogar wohl füele im Nid-so-wohl-Füele,
will de ja gäng wieder es Wohl-Füele im Wohl-Füele chund.
Chömid er druus? – Ig nid, aber s'isch mer vögeli-wohl drbii!

I wett nid wüsse, wevill tuusig Jahr die verträiete Oberwohlfühler
scho uf üsem Ärdeli desume tschalped si,
bis se so cheibemässig lüüchtigi Lüt worde si.
We mängs Mal hei se ächt d Fuscht im Sack gmacht
u sech zämegschrisse
u um das Iiverschtändnis grunge,
wes ne übu gangen isch?

Aber das bruuchts ja hüt alles gar nüm!
Mir glückleche Insasse vo modärne Wohlfahrtsstaate
hei alli e iichlagbare Aschpruch uf permanänts Wohlbefinde vo Liib u Seel!

U wehe dä Aschpruch wird nid erfüllt,
de ischs is de nüm wohl u mer sorge drfür,
dass es däne, wo dä Aschpruch müeste erfülle,
o nüm wohl isch!

Mer pfiiffe uf däne ihri Aschprüch uf Wohlsii,
wes um üser Aschprüch uf Wohlsii geit!
U wenn de seie uf üsi Aschprüch uf Wohlsii pfiiffe
u mir uf seien ihri,
denn isch de bald niemerem me wohl
u all gä sich uf e Gring,
will di angere müeste doch drfür sorge,
dass es üs wohl isch!

U so chömen alli i Fahrt wäg em Wohl,
drum heissts ja Wohl-Fahrts-Staat
u we de d Schiissi richtig am Dampfen isch
u alli sich i de Haare lige will sis wohl-wöhler-am wöhlschte wei
u 's grad drum e kem me wohl isch uf dr Wält oder näbedusse
denn machen ig es Fläschli vom feinschte Räbesaft uf
stoosse mit Charonli a u dr Nachen ab
u rüefen euch no zue: "Zum Wohl!"

 

 

Auf Ihr Feedback freut sich come sempre: info@marpa.ch