Denk-Aufgabe 701 vom 12.1.2007

 

Housi Moser:

Talänt

(accelerando zu lesen)

S'git Lüt, die hei Talänt

U s'git Lüt, die si Talänt

S'git Lüt, die hei s Talänt, Talänt z'entdecke

U s'git Lüt, die tüe ihri Talänt verstecke

S'git Lüt, die choufe Talänt ir Bar u vertschutes tüür witer

U s'git Lüt, die verchoufe ihri Talänt gäge bar oder vermiete se u hei se de glich no

S'git also Lüt, die mache Gält mit ihrne Talänt

U s'git Lüt, die mache Freud mit ihrne Talänt

S'git Lüt, die mache für sich Gält u angerne Freud mit ihrne Talänt

U s'git Lüt, die mache sich Freud u für angeri Gält mit ihrne Talänt

U de gits no Lüt, die mache sich u angerne Freud u Gält u o das isch es Talänt

 

U de gits Lüt, die hei vor luter Talänte Tal-Änte! kei Bärg-Änte

Die stö gar nie wen en Änte am Bärg

Die si gäng scho ännet em Bärg

Dr einzig Bärg, wo se vor sich hei

Isch e Talänt-Bärg, e Bärg us Tal-Änte!

 

Tir müesst nech vorstelle, das isch also o ne Bärg

U zwar e gleit-glitschig-ugantlige Glubber-Bärg us luter Tal-Änte

Wo chrüz u quer u Chrut u Rüebli dürenang überenang gschtungged si

Jedi Tal-Änte wott fürewatschle, wott uufflüge, wott i ds Liecht, wott di töllschti Tal-Änte sii u ds Gfider la glänze

U wenn's de eini gschafft het zoberscht uf em Bärg vo däne Tal-Änte sech uufzpluschtere

U si plötzlech märkt

Dass si ja kei Bärg-, sondern e Tal-Änten isch

De chas es gä, dass se grediache im Sturzflug talwärts tonnered

Bis se dunne im Tal wider e Tal-Änten isch

 

U we Tir meinet, das sigi alles nu Chabis, was i da prischaagge

Sig e Zitigsänte u s'sig itze fei Zit z'ände

Denn chani euch ume säge:

Es isch mit Talänte nid so chrotten angersch als mit Tal-Änte

U wär's nid gloubt, tarf eis es Wücheli im Kielwasser

Vore Talänt-Änte wen em Corinndel här schwadere!

O das brucht Talänt!

U wills niemert git, wo kes Talänt hetti

Wo nid wenigschtens s'Talänt het, hinger eme Talänt här z franünggele

U wenns ume wäri zum erchenne dass Talänt ha o nid immer Honigschläcken u Schnäggenässen isch

Wär erchennt, dass o Talänt öppis relativs si

Dass men unger sine Talänt cha lide, chan ersticke

Dass es vilech eifacher isch nid allzuviel drvo z ha

Nid ganzi Bärge - ume mal dises u eis

U dass men e Mangu a Talänt o chan wettmache dür Motivation, Iisatz, Begeischterig, Hartnäckigkeit

Dä het de ds Talänt mit Talänt u Abwäseheit vo Talänt umzga

U das - so bhoupteni - si letschtemänd die taläntiertischte Lüt

Die wo ihri Talänt u o die vo angerne nid überschetze

Wo se dankbar nutze - u o mit em Fähle vo Talänt nid hadere

Die wo iiverstange si mit Bärg u Tal - äntli hani d Schlusskurve us däm Talänt-Tal-Äntli-Wirrwarr gfunge!

O das brucht Talänt, jedefalls für so Verhedderi-Lüt wie mig!

Uf all Fäll gits e Huuffe Lüt...

Die Denk-Aufgabe könnte darin bestehen, die eigenen Talente Revue passieren zu lassen, den eigenen Umgang damit, das Beklagen oder Einverstandensein mit Vorhandensein oder Fehlen von Talenten - und auch hier das rein rationale Denken irgendwann etwas beiseite zu lassen, den Gefühlen, vor allem aber der Intuition Raum zu geben, die vielleicht mithilft, Unentdecktes freizuschaufeln. Und bei all der Schürferei das Schmunzeln nicht zu vergessen.